Бөлүмдөр
Шейшемби, 20-август
Талас облусуТалас району 08.08.2019 10:20

Айыл турмушу: Чебер айым А.Тыналиева жалгыз чоңойткон балдары билимдүү болуп, кызы Лондондо жашап жатат (сүрөт)

Turmush -  Талас районундагы Жоон-Арык айылынын 65 жаштагы тургуну Акжибек Тыналиева кол өнөрчүлүгүнүн аркасы менен балдарын жалгыз чоңойткон. Чебер апа менен аймактык кабарчы таанышты.

Өзүнүн айтымында, Талас районундагы Көк-Кашат айылынын кызы.

«Кол өнөрчүлөрдүн үй-бүлөсүндө чоңойгом. Таятам, атам, апам кол өнөрчү адамдар болгон. Таятам 1 мүнөтүн текке кетирбеген киши эле. Мен жаштайымдан саймадан баштап, шырдактын оймолорун түрлөп жасайм. Көп жылдар бою соодагер болсом дагы каныбыздагы кол өнөрчүлүк тынч отургузбайт. Боз үйдүн жасалгаларын жасап жүрдүм. Апам азыр дагы боз үй жасалгалайт. Кандай гана эмгек жасабасын бизди аралаштыра жүрөт. Ошондо жумуштун чоңунан майдасына чейин жасаганга кол көнөт экен. Өнөрдү дагы ошол багыт боюнча жумуш жасап, бага билиш керек.

Балдарымдын устачылыктары бар. Адам эмгек кылса жүзү жарык болот дегендей жумушту ылгабай жасайм. Башкысы майын чыгара талыкпастан эмгектенсек жыйынтыгы болот деп ишенем. Илме шибеге, түрдүү ийнелер менен сайма саям. Бирок азыр сайманы колдонгондор азайып бара жатат. Оюмдарды оюп, кооз шырдактарды жасап, айылда эмгектерим тараган. Кийим-кечектерди тигип калган жайым дагы бар. Илгери шырдак эмгектерибиз бааланбай эле калчу. Сатылса дагы арзан болгон. Көбүнчөсү белек же тартуу кылып берилчү. Азыр жакшы баа болуп калды. Сүйүнүп дагы каласың. Шырдактар 3 ай дегенде бүтөт. Андан башка курак иши менен алек болом. Жакындардан буйрутма болуп турат. Замандын нугуна жараша шырдактар өзгөчөлөнүп даярдалып жатат. Андай болсо дагы жакшы. Эң негизгиси жасоо маңызы жоголбосо болду. Шырдак деген керемет буюм, кышында жылуу, жайында салкын.

Өкмөттүн соодасында иштедим. Ишимдин жакшы жыйынтыгы менен сүрөтүм ардак тактадан түшчү эмес. Облус боюнча жаш сатуучу деп бир нече жолу сыйлангам. Жолдошум эрте эле кайтыш болуп кетти. 5 баланы багып чоңойттум. Эмгектерим менен эл артында калбай, балдарымды окуттум. Бир кызым фармацевтика бөлүмүндө билим алса, бир кызым тил багытында окуп, кытай, англис тилинен котормочу болгон. Учурда Лондондо жашайт. Балдарым «апа, сиз кылган эмгектин бирин дагы актай элекпиз» деп турушат», - деди ал.

Чебер айым 3 уул, 2 кыздын апасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×