Turmush — Талас районунун Арал айылынын 30 жаштагы тургуну Тилек уулу Бекзат жыгачтан түркүн буюмдарды жасап жатат. Аймактык кабарчы уста менен таанышты.
Өзүнүн айтымында, жыгачтан идиш-аяк жасатып, кызынын себине кошкондор бар.
«Биздин үйдө чоң атам, атам жыгач усталар. Мен дагы кичинемден ошол өнөрдү көрүп чоңойгонго бат эле үйрөнүп кеттим. Интернеттен ар нерселерди көрүп жасай берип үйрөнүп алдым.
Жыгачын сатып алабыз. Анан ар кандай көлөмдө тилдирип дайындап алабыз. Ар кайсы буюмга ар кандай көлөмдөгү жыгач керектелет. Ошолорго ылайыктап дайындап алабыз. Көбүнчө жыгач идиштерди жасайм. Майда жумуш, бирок өзүмө жагат. Жыгач идиштер көлөмүнө жараша 300 сомдон 6000 сомго чейин сатылат. Козу грилге 6000 сомго жыгач идиш жасаганбыз. Ошол эң кымбат болду.
Биздин жумушка кызыгып, атайын жыгачтан идиш-аяк деп оюмдары менен жасатып кызынын себине кошкондор бар. Өзгөчө эсимде калганы бир жубайлар кызынын Германиядагы тоюна идиш-аяктарды жасатып алып кетишкен. Ал жакта абдан кызыгышкан экен.
Бул идиштердин эң эле жакшысы карагайдан жасалып, материал иштелип чыккан соң жарылып кетпейт. Эч кандай химиясыз жасалат. Бул иш менен бир тууган иним экөөбүз тең алектенебиз. Ал көбүнчө жыгачтан кафелер үчүн отургуч жана кара жыгачтан керебеттерди жасайт», - деди уста.
